Entrevista ao cabeza de lista do BNG ao congreso por Ourense

Entrevista a Xosé Manuel Pérez Bouza, cabeza do cartel ao Congreso polo BNG en Ourense. O paro entre os mozos, o galego nos medios e as supostas conexións da planta de residuos de Xinzo coa trama Brugal son algún dos temas que aborda o senador nacionalista.

A enquisa do venres do CIS apunta a que o BNG manterá dous escanos, pero dálle moi poucas opcións de lograr representantes por Ourense ou Lugo. Que lle diría aos votantes de esquerda de Ourense para convenvelos de que votar BNG en Ourense tamén é voto útil?

No BNG sempre optamos por non valorar as enquisas, pero en todo caso o CIS en ningún momento di que teñamos poucas opcións. E dende logo, todas as sensacións indican que o BNG está á alza e iso tamén ocorre en Ourense, onde estamos vivindo un nivel de asistencia aos actos e de apoio nas rúas durante esta campaña como nunca viviramos antes. E iso ten moito que ver coa consideración que o voto útil, que a única forza política que vai ir a Madrid a defender os intereses dos galegos e cuxo voto non vai estar ás ordes dos poderes financeiros é o BNG.

O programa electoral do BNG di que "neste momento non abonda simplemente con reformas estatutarias no marco dunha Constitución que se ve superada amplamente pola realidade". Quere dicir isto que o Bloque xa non cre nunha reforma do Estauto de Autonomía?

Nese aspecto, o BNG está onde sempre estivo, na defensa dunha Galiza soberana en todos os sentidos, máxima capacidade política e máxima capacidade financieira, ese é o noso obxectivo. O que resulta evidente é que o actual modelo estatutario e constitucional xa non dá máis de si e temos que ir cara a un maior autogoberno, como hai que ir cara outra construción de Europa, totalmente contraria á actual forma neoliberal.

Pero cal é a súa alternativa?

Apostamos por unha Europa dos pobos, non dos mercados, e por unha Galiza soberana a nivel nacional e a outros. A soberanía non pode residir nos despachos dos ricos senón na vontade do pobo. Hipotecar os servizos públicos, a sanidade, a educación, as pensións, en definitiva o benestar da xente, para encher os petos dos banqueiros é faltar á máis mínima decencia democrática. E nós somos demócratas, nesta campaña estamos falando dunha lei de consultas, para facer do referendo un instrumento de profundización na democracia. Non nos poden gobernar persoas ás que ninguén votou nin merecen o voto aqueles que, pregados a intereses da elite, sabemos que tomarán decisións nefastas para as maiorías sociais que nadie apoiou nas urnas xa que non aparecen nos seus programas. PP e PSOE xa sabemos que non respectan a palabra dada. Nós non somos así, non lle temos medo á democracia. E, non está de máis recordalo, por iso somos tan distintos ás outras dúas forzas.

Con que resultado electoral se sentiría satisfeito?

Estamos convencidos de que o nacionalismo galego ten grandes opcións de obter representación en Madrid pola provincia de Ourense or primeira vez na súa historia. Notámolo estes días de campaña porque ademais o BNG acredita nos ourensáns, e temos esperanza que o boa valoración que estes fan do traballo feito polo BNG nas Cortes Xerais, se traduza en apoio eleitoral, se iso ocorre sen ningunha dúbida opteremos representación, ademais non hai ningunha razón para que apoien ao PP ou ao PSOE e non apoien ao BNG, cando xa está máis que demostrado que tanto os deputados como os senadores do PP e PSOE eleitos por Ourense, pasan os catro anos da lexislatura e non abren a boca en defensa dos intereses da nosa provincia, e isto é algo que saben ben os ourensáns.


No seu paso polo Senado gañou certa notoriedade mediática a nivel estatal por ser un dos senadores máis críticos coa propia institución. Tamén gañou un recoñecemento como "senador revelación" por parte da prensa. Con todo, vostede aceptou apostar por encabezar unha lista por Ourense na que ten complicada sacar un escano. Dende fóra parece unha aposta política moi arriscada para o futuro da súa carreira ....

A miña carreira?.. Eu non estou en política para facer carreira persoal, eu estou en política para defender os intereses do meu pobo e dos seus cidadáns, e por iso sempre estiven alí onde o BNG e eu mesmo pensamos o meu traballo pode ser útil para acadar ese fin. Se o os ourensáns queren que os represente en Madrid, no Congreso dos Deputados, fareino orgulloso, senón o día 21, coa mesma discreción que deixei o meu traballo no 2008 para representar aos galegos/as no Senado, volverei ao miña plaza de enfermeiro do SERGAS, a seguir traballando polo pais desde outros ámbitos. E se no Senado este traballo do BNG obtivo certa relevancia foi primeiro porque, desgraciadamente, a maioría dos que alí están en representación doutras forzas non fan absolutamente nada, están de retiro pagado con cartos públicos. Con toda a humildade eu traballei todo o que puiden e seguirei a facelo, é o normal. Dado que o resto de senadores por Galiza non o facían, era eu só intentando encargarme de tres millóns de galegos, e iso dá para traballar arreo.


Cada vez que o seu nome ou o de Jorquera saen no GC, algún dos comentaristas habituais sempre critica que os representantes do Bloque nas Cortes nunca lograron traer nada concreto para Galicia, a diferencia, di, dos nacionalistas cataláns e vascos. Sería quen de sinalar algún avance concreto para Galicia que se produciu esta lexislatura grazas aos representantes do Bloque en Madrid?

Iso é rotundamente falso, non hai grupo parlamentario no Congreso e no Senado, que rentabilice tanto a súa representación como o BNG, nin tan sequera os vascos ou os cataláns. Os logros foron moitos, pero por citar só un de gran relevancia direi que Galiza conseguiu un porcentaxe das inversións do Estado do 8% e máis de 2.000 M € cada ano, grazas a presenza do BNG, senón aínda tardaríamos moito tempo en chegar a estes porcentaxes. Pero ademáis a nos presencia fai que se eviten moitas discriminacións con Galiza que se nos non estiveramos produciríanse continuamente sin que os representantes do PP e do PSOE eleitos por Galiza, nin tan sequera abran a boca. Por dar outro dato na última lexislatura a pesar de votar en contra dos orzamentos do Estado por consideralos perxudiciais para os galegos e as galegas, conseguimos aumentar as inversións en Galiza en máis de 150 M€. Que alguén me diga quen conseguiu máis con 2 deputados e 1 senador, ou que alguén me diga de que lle valeu a Galiza ter no Congreso dos Deputados 11 representantes do PP e 10 do PSOE, para nada, esa é a realidade. A realidade é que dende que o BNG está en Madrid en 1996, Galiza está presente na política estatal, quen se preocupaba de nós antes? Ninguén. Por iso somos o único voto útil para Galiza.

Que lle parecen as declaracións dos líderes do PSdeG de Ourense dicindo que o único voto útil para a esquerda na provincia é para os socialistas?

O único voto útil para Galiza é ao BNG, pero tamén o único voto de esquerdas en Galiza é ao BNG, o PSOE demostrou nos últimos meses estar ás ordes dos mercados e iso é a antítese do que significa a esquerda. Xa hai moitos anos que Joaquín Sabina decía nunha canción que o Partido Socialista Obrero Español, o único que lle quedaba era o de Partido e o de Español, por que o de Socialista e o de Obreiro había tempo que o perdera.

Nos últimos meses desapareceron a práctica totalidade das cabeceiras en galego. Un dos factores que contribuíu a este desenlace é a falta de axudas da administración. Pode o Estado xogar algún papel para fomentar os medios en galego?

Votando ao BNG pode ser, votando aos outros seguro que non. En todo caso, o maior culpábel do acoso que sofre a lingua e a cultura galega é o PP de Rajoy e Feijóo, que se manifestou con Gloria Lago e Rosa Díez en contra do galego. Eu consultaba os medios no noso idioma e teño a esperanza de que algún día muden as cousas e con absoluta normalidade a maioría dos medios utilicen a nosa lingua, por que por moito que o intenten con este país non van poder.

Ourense segue a ser unha provincia na que a mocidade ten dúas alternativas, opositar ou emigrar. Que alternativa ofrece o Bloque aos mozos para fomentar o emprego na provincia?

A desfeita económica á que levaron a Ourense é de tal calibre que xa non é só que a mocidade teña que emigrar, senón que case xa non hai xente nova. Pero insisto en que eu creo nas nosas comarcas, que teñen unha potencialidade tremenda en moitos aspectos, como no agro-gandeiro, no turístico, tamén no industrial. O que hai que facer é deixar de regalar os cartos aos poderosos e investilos na xente, o que hai que facer é unha reforma fiscal que acabe coa fraude dos ricos e que lles faga pagar máis aos que máis teñen para favorecer ao pobo, o que hai que facer e acabar co gasto inútil nas deputacións, o que hai que facer é mover o crédito aos autónomos e as pequenas e medianas empresas, algo que entre o Goberno central e a Xunta acaban de liquidar coa destrucción das caixas, de aí que nós apostemos por unha banca pública, ao servizo dos galegos, non das bolsas e o ladrillo. Temos agora unha oportunidade inmellorábel para conseguilo, pero Feijóo non quere. Prefire regalar décadas de aforro dos galegos aos especuladores.

Vostede vinculou o anuncio dunha planta de tratamento de Residuos en Xinzo co caso Brugal. Por que?

Porque é a verdade. A empresa que veu a Xinzo a presentar o proxecto por mediación do Alcalde do PP, non é mais que unha "tapadeira" dun entramado empresarial directamente vinculado cunha trama de corrupción que ven actuando na zona do Levante español, que está sendo investigada na "Operación Brugal". Resulta curioso que este a este tipo de proxectos especulativos e mafiosos conten con aval do PP. Desde logo o BNG quere outro tipo de proxecto industriais para A Limia e para Ourense. Proxectos que pechen o círculo productivo, que xeneren riqueza e postos de traballo sen destruir o que hai e sen ter un efecto negativo sobre o medio. En definitiva o BNG non vai permitir que a Limia, que ten un gran potencial agrario, se convirta no vertedoiro de Galiza, por obra e gracia do PP.

12 de Outubro, nada que celebrar

Como resposta ás celebracións oficiais do “Día de la Hispanidad”, inzadas de exibicións de militarismo e españolidade, a nosa organización editou un cartaz que colou en varias comarcas do país co lema: A súa “Fiesta Nacional” conmemora un xenocidio. 12 de outubro, nada que celebrar

O 12 de outubro de 1492 supuxo o comezo de mais de 500 anos de masacre sistemática da poboación americana e espolio dos seus recursos, espolio que ainda continúa da man de empresas (moitas delas españolas) que explotan os recursos naturais deses países e da permanente ameaza ou agresión directa do imperialismo.

O “Día de la Hispanidad”, aniversario do comezo da longa escravitude de todo un continente que agora comeza a espertar, é unha data de festa e orgullo para o Estado no que nos obrigan a viver, mais tamén unha data contra a que se rebela a mocidade máis consciente e combativa.

XORNADA FESTIVO POLÍTICA

O sábado 9 de xullo Galiza Nova organiza en Manzaneda unha xornada festivo-política.

As 11:30 partirá da praza do Concello un roteiro no que pode participar todo o mundo dunhos 5 quilómetros e que servirá para coñecer un pouco mais a zona.

As 14:00 no restaurante Nevada celebrarase un xantar para a xente que queira. Anotarse antes do Xoves 7 de Xullo. O prezo será arredor dos 10 €.

As 16:30 no salón de actos do Concello de Manzaneda celebrarase unha mesa redonda aberta a todo o mundo sobre alternativas para o desenvolvemento das zonas rurais, actuacións a levar a cabo para fixar poboación e infraestructuras necesarias para poder levalo a cabo. Participarán:
XOSE MANUEL PÉREZ BOUZA - Senador do BNG.
DAVIDE RODRIGUEZ - Alcalde de Manzaneda.
XOSE ANTONIO NUÑEZ - Ex-Alcalde de Manzaneda.

As 19:00 nas inmediacións do pavillón xogaranse aos bolos celtas e a billarda, deportes tradicionais típicos da zona.

Para mais información ou anotarse ao xantar enviar un email a trives.gz@gmail.com

Galiza Nova concentrouse diante do Parlamento contra a supresión do Noitebús

Na mañá de hoxe debateuse no Parlamento galego unha Proposición Non de Lei, presentada polo BNG, na que se instou ao goberno do PP na Xunta de Galiza ao mantemento do Noitebús, tendo en conta o grande respaldo social co que conta este servizo e a súa importante contribución na redución da sinistralidade da xente nova nas estradas. A posición do PP foi, unha vez máis, a de ir en contra das mozas e mozos galegos votando negativamente a esta iniciativa e reafirmándose en que van retirar a subvención precisa para o funcionamento deste servizo.

Mentras tanto, ás portas do Pazo do Hórreo Galiza Nova congregou a un numeroso grupo de mozas e mozos na concentración simbólica que a nosa organización convocou contra a supresión do Noitebús. Quixemos, deste xeito, amosar o noso rexeitamento ante a intención do PP de suprimir este servizo, amplamente demandado pola mocidade e que ten demostrado unha importante contribución á hora de facilitar a mobilidade das e dos máis novos e ao mantemento da seguridade viaria.

Desde a nosa organización encetamos con este acto unha importante campaña dirixida a informar e mobilizar ás mozas e mozos galegos fronte a este novo atropelo do goberno do PP na Xunta de Galiza. Así realizaremos ao longo de todo o país actos informativos e iniciamos xa unha campaña de recollida de sinaturas contra a supresión do Noitebús. Súmate a nós!

Presentada a ILP en defensa do galego!

Na mañá de hoxe Galiza Nova participou da presentación no rexistro do Parlamento de Galiza da Iniciativa Lexislativa Popular que dende a Plataforma Queremos Galego está a impulsarse. En verbas da Secretaria Xeral, Iria Aboi, “esta ILP ven a garantir os dereitos lingüísticos do noso pobo, fronte as políticas de exterminio lingüístico do Partido Popular na Xunta de Galiza.”Dende a nosa organización reiteramos que volcaremos todos os nosos esforzos para que a ILP chegue a debaterse no Parlamento galego, para o cal se require un mínimo de 15.000 sinaturas, respondendo de forma activa ante os ataques do PP á lingua propia da nosa nación. Súmate a nós!

XI Asemblea Nacional de Galiza Nova

O 24 e 25 de outubro de 2009 celebramos en Santiago de Compostela a XI Asemblea Nacional de Galiza Nova e, a continuación, damos conta dos resultados dos debates e das votacións resultantes desta.

O Informe de xestión da Dirección Nacional ficou aprobado co 56,92% dos votos a favor, o 40,51% de votos en contra e co 2,56% de abtencións.

O conxunto das Teses a debate nesta IX Asemblea de Galiza Nova aprobáronse co 80% dos votos a favor, co 13,77% dos votos en contra e co 6,22% de abstencións.

Do resultado das votacións á Dirección Nacional de Galiza Nova na XI Asemblea Nacional, os resultados foron dun 57,5% dos votos á lista encabezada por Iria Aboi e 15 representantes, un 20,9% dos votos para a lista encabezada por Noa Presas e 5 representantes, un 19,3% dos sufraxios para a encabezada por Ínhigo Ansotegui e 5 representantes. En consecuencia, Iria Aboi foi reelixida para a Secretaría Xeral de Galiza Nova.

A XI Asemblea de Galiza Nova contou coa presenza de numerosas organizacións do país: A Mesa, CIG, Comités, SLG, ORGACCMM, entre outras; do Consul cubano na Galiza, así como do portavoz nacional do BNG, Guillerme Vázquez, ademais dos membros da Executiva Nacional Montse Prado, Carlos Aymerich e Rafa Villar, o deputado galego Bieito Lobeira, a portavoz en Bruxelas, Ana Miranda e o ex-secretario xeral de Galiza Nova e ex-director xeral de Xuventude, Rubén Cela.

Cea de Galiza Nova Trives e Caldelas

Galiza Nova Terras de Trives e Caldelas organiza unha cea o próximo sábado día 31 de Agosto as 22:00 horas en Casa Cachín, en Abeleda, no concello da Teixeira, pertencente as Terras de Caldelas. Se queres acudir apuntate enviando un email a: trives.gz@gmail.com ou no teléfono: 627780891.

Discursos de Queremos Galego

Despois da gravísima manipulación feita pola FeijooTV (TVG), apresentamos os discursos feitas na Quintana no remate da manifestación mais importante pola defensa da lingua da historia.

Patricia Vázquez:


Carlos Callón:


Xurxo Souto:


Avelino Pousa Antelo:


Himno nacional:

Castañazo 09 Maceda

Galiza Nova Terras de Trives e Caldelas anima a mocidade da comarca a acudir este próximo sábado día 24 de Outubro ao Castañazo de Maceda.

A nosa organización colaborará na celebración desta festa popular galega. Os bolos celtas que se xogarán serán coa denominación de orixe de Soutipedre (Concello de Manzaneda).

O programa é o seguinte:

Programa:
16:30 - Aberto de billarda (LNB)
17:30 - Campeonato popular de bolos celtas (Normativa Soutipedre)
19:00 - Leo i Arremecághona
20:00 - Inicio do Magosto
22:30 - Inicio do Festival con actuacións de:
O SONORO MAXÍN
SOM DO GALPOM
TRES TREBÓNS
FRACASADOS DE ANTEMANO
DJS DE LA TORRE BROTHERS

Éxito na manifestación pola defensa do galego

Galiza Nova Terras de Trives e Caldelas estivo presente, na maior manifestación da historia en defensa do galego. Mais de 100.000 persoas colapsaron Santiago de Compostela pola defensa da nosa lingua. A nosa organización desplegou dúas faixas, a de cabeceira co lema: O ensino en galego é o noso dereito! e outra coa imaxe de Castelao e a frase do Sempre en Galiza “Se aínda somos galegos e por obra e gracia do noso idioma”. Este deseño tamén foi utilizado nos autocolantes que Galiza Nova xunto coas chapas LG: Eu Son de Lingua Galega estivo a repartir no transcurso da manifestación. Ao igual que sucedera na pasada convocatoria do 17 de maio a xente nova deixou patente unha vez máis o seu firme compromiso coa normalización do galego demostrando así mesmo, que loitará activamente contra todas aquelas medidas do PP que supoñan un a taque a nosa lingua e un paso atrás nos dereitos das/dos galegofalantes.

SEMPRE EN GALIZA, SEMPRE EN GALEGO

Queremos galego

Galiza Nova Terras de Trives e Caldelas participará na manifestación da Plataforma Queremos Galego.

Imaxes e video das xornadas de verán

Galiza Nova Terras de Trives e Caldelas celebrou este agosto as súas primeiras xornadas de verán. As xornadas comezaron cunha visita ao castelo de Castro Caldelas, para a continuación visitar os pobos de San Xoán de Río e a Pobra de Trives. Ao medio día xantamos no Pazo de San Lourenzo para a continuación visitar o castiñeiro milenario de Pombariños. Xa pola tarde trala visita a unha bodega da Ribeira Sacra disputouse un aberto de billarda coa colaboración da LNB e outro de bolos celtas.

O FEMINISMO A TRAVÉS DA HISTORIA

Open publication - Free publishing

"Viva Galiza Ceive"

Debido a que parte dos visitantes da nosa páxina web son emigrantes galegos que agora viven a miles de quilómetros da súa patria en lugares coma Francia, Suiza, Reino Unido ou Arxentina, entre outros, recuperamos o discurso de Antón Avilés de Taramancos pronunciado en Suiza fai 22 anos e que sigue estando completamente de actualidade, sobre todo para esta xente. Esperamos que este texto faga recapacitar aos galegos que tiveron que emigrar do noso país.

Traio aínda fresco nos ollos o contorno da patria. Desde Teixido a Santa Trega e desde Fisterra ao Caurel, Galiza vén como nun sono a campear aquí no teito de Europa para reclamar na súa propia voz o seu sangue espallado polo mundo, a súa xente perdida, o esforzo de tanto traballo, de tantas bágoas de raiba e de saudade, que tamen a ela a deixan orfa, escoada, valeira dos seus millores fillos. Veño, irmáns, a nome da Terra Nai a travervos a palabra sagrada do seu amor e do seu desespero. A traveso dos tempos esta vella sofrida e abandonada que é a nosa patria foi perdendo o froito dos seus partos, e tén a casa a medio erguer, a eira sen cercado, a onde entran as aves de rapiña para desposuila constantemente de todo canto é seu, para desfigurala, para deixala cega nos camiños do mundo. Cada un de vós é unha pinga de sangue que se lle foi e que a vai deixando pouco a pouco nunha anémia perniciosa da que non se pode recuperar.

Non pode haber unha pátria forte e farturenta se todos os seus fillos non a habitan. A desgracia histórica de non ser do noso país e que nos obriga a andar polas portas do mundo tén que chegar ao seu fin. O noso povo tén que coller as rendas do séu destino, ou vai a desaparecer do conxunto das nacións saíndo pola porta pequena como saían os escravos e os ilotas.

Eu veño, irmáns, con un mensaxe de esperanza. Hai xente, moita xente, que está a loitar para que a pátria consiga a plena liberdade, que a Nai forzada ao abandono volva a acoller aos seus fillos, que todos construamos en paz os muros da nosa casa común, que aremos as terras, que poñamos a funcionar as fábricas, que ergamos as nosas mans en defensa do que nos pertenece, e que ninguén mais teña que saír polo mundo senon é para gozar de hoteis de cinco estrelas e non para limpalos etermamente e que outros os disfruten.

Se despois do esplendor medioeval que puxo a Galiza nos cumes da cultura univeral, as circunstancias históricas non nos foron propícias e pasamos a ser un pobo e unha lingua dominados, as consecuencias económicas da dominación fixeron de nós unha colonia expoliada, empobrecida polos foros e tributos, e aínda máis: deshabitada sistemáticamente da súa mocidade máis cumprida, adiestrada e obrigada para a emigración e para que os seus aforros (eses cartos desditados conseguidos entre a penuria e a lonxanía) engrosasen a Banca do Estado para beneficiar outras latitudes que nos ollaban con desprecio e villanía. Este ir escoando ao traveso dos tempos o sangue novo e vizoso do povo foi empobrecendo-nos cada vez máis. Os grandes logros dos galegos, os seus grandes triunfos de organización mutual e empresarial foron-se dando en lonixanos territórios, que milloraron o seu caudal e a súa facenda á conta do noso esforzo. Países como Arxentina, Cuba ou Venezuela fixeron as súas modernas estructuras en base do traballo e da imaxinación de milleiros de galegos transplantados que non puderan na súa terra levar a cabo esa labor de redención e de progreso. Agora os que andades polos vieiros da Europa estades a erguer coas vosas própias mans a riqueza dos países que nos someten e que nos empobrecen cada día máis. Debaixo do mapa dos Estados da Europa subxace a verdadeira Europa dos Pobos, que tén que aflorar para que Europa viva en harmonia co seu própio ser. Ademáis de reclamar os nosos dereitos de autodeterminación e vida própia entre as nacións do mundo, temos que ser solidarios cos que estan a padecer os mesmos atrancos e as mesmas vicisitudes. Vós que vivides nunha República de múltiples línguas e culturas sabedes ben que se pode conseguir es harmonía se cada quen se respeta a sí mesmo e respeta as liberdades e a identidade dos demáis. Os que vivides e traballades na Suiza tendes que ir recollendo e transmitindo a todos os galegos e aos demáis povos da Iberia para que nos entendan, esas vivencias de xentes diferenciadas que poden conformar un conxunto próspero sen imposicións e sen enfrentamentos.

Eu tamén, meus amigos, pasei vinte anos de exilio por terras de Colombia, e sei o que costa minuto a minuto estar fora da pátria. Sei o que é erguer un fogar en terra allea, e sei como o voso corazón se arrofia de espanto de ver como pasa o tempo sen saber cando se vai regresar. Cada día que pasades fóra do voso lar é un día que se lle rouba a unha vida plena e feliz. Sei que os cartos que gañades con sacrificio non pagan as horas de tristeza e lonxanía. O voso pan é amargue. Pero nós, que vivimos nos eidos da Terra, tampouco podemos ser felices mentras non esteamos todos xuntos, mentras a cada casa non cheguen os que faltan e haxa de novo lume, e risas e alegría. Non podemos construir a pátria sen as vosas mans. Non podemos alcender o lume se non brillan os vosos ollos ao calor da fogueira. Somos unha tribo dispersa que non será feliz até que se atope enteira e reunida.

A Nosa pátria cimenta-se no pasado para ollar de cara o futuro coa nosa propia visión, cos nosos própios ollos; até o de agora os mesmos que nos cegaron foron-nos levando ao precipício onde pode morrer a nosa identidade, onde se afogan os berros do noso sentir, e onde pouco a pouco se vai perdendo o son da nosa fala. Se non nos arrepoñemos dunha vez nun sentir colectivo de defensa da nosa personalidade, Galiza vai-se perder e non seremos máis que a pantomina dun povo que representa unha actuación perante a História de persoaxes valeiros, sen alento de seu, sen palabra de seu, perdidos nun rol feito adrede polos que manexan os fíos e que nos queren facer monicreques. En cada un de vós, aínda os máis manipulados por unha educación do "Imperio hacia Dios" que ven de máis antigo do que parece, en cada un de nós alenta sempre a fonda raíz da pátria. A pátria está na música que nos fai tremer o corazón. A pátria está nas verbas das nosas cántigas, a pátria está nesa dor profunda que nos carcome cando andamos lonxe e na felicidade da chegada. Está na paisaxe que levamos grabada, os montes e o mar e os rostros da xente que amamos e que levamos na memória. A pátria está no sentimento que nos une e que nos fai irmáns.

Eu podía chamar a cada un de vós polo seu nome. Estou vendo a vosa casa, Estou vendo a vosa nai ollando por riba do horizonte nese agardar eterno. Vós sodes, irmáns, a miña patria. Sodes quen me da o alento para escribir e para soñar, sodes quen me dá o pulo para seguir loitando para que Galiza sexa doña de sí mesma e que un día vos vexa ir chegando para que cada un no seu labor vaia pondo as colunas da grande casa común.

Irmáns galegos, Xente de Breogán, eu pídovos que neste día xuntedes os vosos corazóns para decir conmigo, para berrar conmigo dende os cumes de Europa e que nos ouza o mundo:

"VIVA GALIZA CEIVE E POPULAR!"

NACE A GALICOLA

Un novo producto exclusivamente galego tentará facer fronte a dous símbolos do modelo de consumo americano: a Pepsi e a Coca-Cola. Ademais financiará a promoción da língua galega.

Un reducido grupo de persoas acabou de crear a Asociación Cultural Fontaira co obxetivo de crear este novo producto en botellas plásticas de 33 centilitros e medio litro. O Producto terá o nome de Galicola.

A Galicola vai destinar todo o seu beneficio a língua do país, financiando proxectos en defensa da língua galega, para que o diñeiro non sexa un impedimento para a xente que defenda o noso idioma.

Non é unha empresa

Ninguén se vai a lucrar con este proxecto, depois do pagamento dos custos de fabricación, distribución e salarios, todo o beneficio será destinado ao movemento normalizador. Aínda que non se cubriran os gastos de producción o 5% de cada venda irá parar a un Fondo polo Galego. Desta maneira, calquer persoa terá a certeza de que unha parte do que paga polo refresco acabará por financiar un festival, un medio de comunicación, unha asociación polo idioma, unha escola monolíngüe en galego, un centro social, etc.

A forma de que os proxectos sexan financiados por Galicola será o Concurso Ánxel Casal (mecenas da língua fusilado polo franquismo), que decidirá, cada 17 de Maio, o Fondo polo Galego. Calquer entidade sen ánimo de lucro que non teña gañada a anterior edición poderá presentar unha única candidatura que defenda a sua actividade pró-normalizadora en termos globais ou ben unha actividade concreta en prol do idioma.

O destino que cada colectivo dará ao diñeiro recibido será publicado anteriormente na páxina web da Galicola, para ser consultado por eventuais votantes ou participantes no concurso. As candidaturas faranse entre Setembro e Decembro.

Canto mais bebas, mais votas

En Xaneiro serán publicadas todas as candidaturas. Entre Xaneiro e Maio tódolos consumidores de Galicola poderán votar a que mais lles guste. A etiqueta de cada botella poderase utilizar como voto se o consumidor o desexa. Por tanto se un consumidor tomar 5 Galicolas terá dereito a 5 votos. Así ata o 17 de Maio, a data en que os votos serán contados e o diñeiro do Fondo polo Galego será distribuído entre os dous proxectos mais apoiados.

A PARTIRES DE AGORA NEN PEPSI, NEN COCA-COLA. PIDE GALICOLA. O TEU IDIOMA O NOTARÁ.

Mural realizado en San Xoán de Río

Galiza Nova Terras de Trives realizou con motivo do día da Patria un mural en San Xoán de Río.

ENCONTRO DE VERÁN GALIZA NOVA TRIVES

O sábado 15 de Agosto, Galiza Nova Trives organiza un encontro de verán con múltiples actividades para a xente da comarca. Salvo o xantar, tódalas actividades son completamente gratuitas.

A xornada comeza en Castro Caldelas, as 10 da mañán temos o punto de quedada no campo da feira de Castro Caldelas, alí subiremos polo casco vello caldelao ata o Castelo que visitaremos.

Ao rematar no Castro desplazarémonos a Mourúas, no Concello de San Xoán de Río, onde realizaremos a ruta da Fraga (ruta de sendeirismo cunha dificultade baixa e que nos levara entre 1’30 e 2 horas) rematando a ruta no centro da vila de San Xoán de Río.

A continuación desplazaremonos a San Lourenzo, no concello da Poboa de Trives, onde xantaremos no seu Pazo. O prezo do xantar é de 10 € e compre avisar se vas a vir xa que é necesario reservar.

Despois do xantar desplazaremonos a Soutipedre (Manzaneda) onde aprenderemos a xogar tanto os bolos celtas, como a billarda, 2 xogos populares galegos. Tras unha aprendizaxe básica de ambos xogos realizaremos campionatos das dúas disciplinas con premios para os mellores en cada torneo.

Para rematar visitaremos unha bodega da Ribeira Sacra onde teremos unha degustación gratuita de viños e licores.

Para apuntarse chamar aos teléfonos 636059234 ou 627780891, ou enviando un email a trives.gz@gmail.com

ANIMATE E PARTICIPA.

Un Día da Patria Galega masivo!

Galiza Nova Terras de Trives e Caldelas participou activamente na manifestación do día da patria así como no Festigal. Esta é a crónica da web do BNG da manifestación:

Era o que o País necesitaba: un Día da Patria Galega masivo para patentizar que esta nación continúa viva e que non vai renunciar a defender os seus dereitos. Unhas 20.000 persoas -algún meio de comunicación sinalou esta como a manifestación máis numerosa dos últimos anos- rebordaron as rúas do casco vello e desbordaron os límites da Praza da Quintana. Unha resposta cívica, festiva e moi emotiva ante as agresións que o Goberno Feijóo en apenas 100 días de exercicio ten perpetrado contra a nación galega e os seus sinais de identidade, a comezar pola lingua.

O BNG ofreceu a imaxe dunha organización que, unha vez feitos os deberes internos, ten folgos de abondo para construír a alternativa ao Partido Popular e derrotar en catro anos o proxecto reaccionario e anti-galego de Núñez Feijóo.

Como adoita dicir o portavoz nacional, "hai pobo, hai vida, hai esperanza".

DOUS ALICERCES BÁSICOS

O discurso de Guillerme Vázquez na Quintana construíuse sobre dous alicerces básicos: primeiro, transmitir a idea de que o BNG está aquí e non vai claudicar, perante o conformismo dos partidos españois en Galiza, que xa andan a argallar unha reforma do Estatuto para consolidar a presenza do noso País na Segunda División do Estado; segundo, espallar coa mesma enerxía a determinación do BNG de combater e vencer o Partido Popular e o que este significa tanto no eixo da política nacional como no plano da política social.

Galiza vive unha dupla crise, económica e política, pero claro que hai solucións: pasan por camiñar cara a un Novo Estatuto de Nación e por desenvolver desde o poder político galego políticas socieconómicas que favorezan ás maiorías sociais.

Pasan, portanto, por que o nacionalismo, cohesionado e reilusionado, traballe duro estes catro anos para persuadir ao conxunto da sociedade de que as solucións aos nosos problemas non pode vir dun partido da dereita españolista, senón dunha forza política propia do País e claramente comprometida cun modelo social favorábel ás maiorías.

Festigal 09

Un ano mais chega o Festival para celebrar o día da nosa patria.

Bastante xente das comarcas de Trives e Caldelas acudirá ao Festigal. Se queres vir non dudes en poñerte en contacto con nos:

Estes son os concertos programados:

VENRES 24

23:00h

· Chamallexis! (Galiza)
· Os John Deeres (Galiza)
· Som do Galpom (Galiza)
· Dj Click Live (Franza)

SÁBADO 25

22:00h

· Descarga ao Vivo (Cuba / Galiza)
· Katembe Project (Angola)
· Os Tres Trebóns e Amighos, A Grande Treboada (Galiza)

Ademais, os días 24 e 25, haberá máis música no Café Concerto, con actuacións de artistas variados a partir das 17:00h.

GALIZA NOVA TRIVES A FAVOR DA GRATUIDADE DOS LIBROS DE TEXTO

Unha das principais reivindicacións que Galiza Nova vén demandando dende a súa creación é un ensino galego público e de calidade. Neste sentido a nosa organización quere amosar o seu firme rexeitamento á decisión do PP de eliminar a gratuidade dos libros de texto, cuestión que durante a campaña Feijoo prometera manter.Coa proposta anunciada pola Consellaría de Educación que muda a gratuidade por axudas, a maioría das familias terá que asumir os custes dos libros, sendo contadas as que poden acceder ás mesmas. Os límites establecidos pola Xunta para ter dereito a estas axudas son extremadamente baixos, dándose a situación de que familias mileuristas quedarían excluídas ou as familias monoparentais que non está obrigadas a facer a declaración da renda por nível de ingresos tamén quedarían fora deste sistema de axudas.Para tentar frear esta medida o BNG entre outras actuacións presentou mocións en todos os concellos do país pedindo a gratuidade.

Ademais esta medida terá un maior coste para os petos de tódolos galegos, xa que o anterior sistema de gratuidade funcionaba como un préstamo de libros ano tras ano, durando cada libro sobre 4 anos. Agora arredor do 30% dos galegos terán dereito a estas axudas, que durante os vindeiros 4 anos desta lei suporan un maior coste, xa que haberá que pagarlle os libros tódolos anos as persoas con dereito a gratuidade en vez do actual sistema que en 4 anos so se mercaban os libros unha vez.

Ademais o PP, afirma demagoxicamente que esto é unha lei de esquerdas, xa que os “ricos” (persoas que cobran 1.000 € ao mes ou mais) pagan e os outros non. Dende Galiza Nova Trives pensamos que o que verdadeiramente é de esquerdas son uns servizos públicos universais e gratuitos e o demais non é mais que facer demagoxia. Acaso o PP pensa en prohibir o acceso a ensinanza pública e gratuita? acaso quere sacar a sanidade gratuita para os que mais cobran? Ao mesmo tempo votan en contra de subirlle os impostos as rendas mais altas e aos salarios dos futbolistas.

Por outra banda fíxose unha enquisa vergonzosa sobre o idioma na ensinanza gastando miles de euros para “saber a opinión dos país” respecto o idioma no que queren educar os seus fillos, non deberían preguntar tamén se queren ou non queren pagar os libros de texto?

A EDUCACIÓN SEMPRE GRATUITA E DE CALIDADE PARA TODOS